الرئيسية » أراء حرة » محمد أبو النصر يكتب : تأملات …

محمد أبو النصر يكتب : تأملات …

محمد أبو النصر يكتب : تأملات …
أعتقد إن البداية الصحيحة لحل المعضلة المصرية مش هتكون بالإصلاح الإقتصادي أو السياسي ولا حتى التعليم, مشكلتنا الكبرى هي الـ Path أو الطريق نحو القمة, الطريق ده للأسف ممهد تماما للموالين والمؤيدين بشكل مطلق, وبالتالي يصل الأكثر ولاءا الى مناصب صنع القرار حتى ولو كان الأغبى, لكن مهما كنت كفء أو عبقري فالنظام العام لا يرحب بك, الطريق مش مصمم عشان الناس دي توصل الى مراكز القوى.
الأشخاص في أي مجتمع بيكونوا أذكى وأكثر كفاءة من بعضهم في مجالات معينة, يعني ممكن تلاقي شخص هايل في الهندسة وفاشل في الإدارة, أو دبلوماسي عبقري بس مابيفهمش إقتصاد, شخص ممتاز في التنفيذ وآخر في التخطيط, وهكذا. دور الدولة هنا, إنها تمهد الطريق عشان المتميز في كل مجال ينجذب أوتوماتيكيا الى المنصب اللي هيفيد فيه المجتمع, بحيث يصعد الأصلح تدريجيا الى قمة الهرم الإداري, وبالتالي يبقى اللي فوق أذكياء كفاية إنهم يضعوا سياسات عامة تؤدي الى رخاء كل اللي تحت.
الـ Path السليم ده بينتج عنه إن كل عضو في المجتمع هيركب في المكان الأنسب له ولمجتمعه, هتلاقي المميزين في الطب بقوا أطباء والمميزين في الإدارة بقوا إداريين, من خلال الفهم ده تقدر تفسر الوضع المزري اللي وصلنا له, وتقدر تفهم ليه فيه ناس في مناصب حساسة تشعر ان عندهم مشكلة واضحة في الـ IQ وتستغرب هو إزاي وصل هنا ومين اللي اختاره, وعشان كده بنشوف وزراء ضعاف, أو مدير شركة حكومية غير كفء بالمرة, وإعلاميين عندهم برامج بالساعات يخلوك تضرب كف على كف من الهراء اللي بتسمعه منهم.
بالرغم إن دي أخطر وأكثر مشاكلنا أولوية من وجهة نظري, لحسن الحظ حلها مش محتاج تمويل ولا فلوس ولا مؤسسات دولية, ده مجرد قرار, إرادة سياسية, مجرد إنك تفهم إن ناس كتير من اللي في مواقعها الحالية سواء في الحكومة, الهئيات, الوزارات أو الشركات هم أكبر نكبة على المجتمع, وإنهم الحافز الرئيسي لفشلك كصانع قرار وفشل الدولة كلها, كل المطلوب هو شوية وعي بديهي بإن المفروض يكون في معايير أو Criteria عمياء هي اللي بتختار وتجذب الممتازين الى مناصبهم الصحيحة بغض النظر عن طبقته الإجتماعية أو علاقاته أو دينه أو آرائه السياسية, لكن إحنا جايبين الدب القطبي ومعيشينه في الغابة وودينا القرود للصحراء والجمل في البحر وخرجنا السمك من المياه, بعدين حطينا سياسات إصلاحية ومتوقعين من الحيوانات دول إنهم ينفذوها بنجاح!

عن zema

شاهد أيضاً

محمد صوابي يكتب ولنا رأى (((…مصر في حالة النقاهة بعد استأصال المرض العضال الذي أرهق الجسد المصري طوال سنوات مضت…)))…

محمد صوابب يكتب ولنا رأى (((…مصر في حالة النقاهة بعد استأصال المرض العضال الذي أرهق ...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *